Cova5 News (12/07/2022) Tersa -Feira ohin Sekretáriu Estadu Formasaun Professionál no Empregu (SEFOPE) liu husi Centru Treinaméntu Claret (CTC) realiza formasaun ba dala tolu, ba prijioneirus 25 iha Prijaun Suai Munisipiu Covalima.
Diretór Jerál SEFOPE Paul Alves hateten, Formasaun ne’e realiza ho objetivu atu kapasita Prijioneirus sira iha Prijaun Suai, oinsa sira bele halo servisu hanesan konstrusaun Sivíl, Holtikultura, karpinteiru nsst, bainhira sira hetan ona liberdade husi Prijaun Suai.
“Objetivo husi programa ida ne,e programa formasaun movel ne,ebe mak SEFOPE servisu ho Ministériu justisa liu-liu Prijaun Suai oinsa maka ita bele fornese formasaun konaba movel ba prijioneirus rua nulu resin lima, formasaun konaba oinsa maka bele fila rai, dada eletrisidade depois seluk-seluk tan” Diretor Jeral SEFOPE dehan iha Prijaun Suai.
Diretór Prijaun Suai Júlio Dias Ximenes agradese ba Sekretáriu Estadu Formasaun Professionál no Empregu (SEFOPE) ho Centru Treinaméntu Claret (CTC) tanba bele kapasita ona ninia prijioneirus sira konaba area oioin.
“Formasaun ne’e bad ala tolu ona, konaba kostrusaun Sivíl ne’e dala rua ona, ikus maka sei konaba holtikultura, ne’ebe hau agradese tebes ba SEFOPE nomos Centru Treinamentu Claret tanba bele kontinua realiza formasaun ne’e ba ami nia Prijioneirus sira” Júlio Dias Ximenes expressa.
Entretantu ba futuru Sekretáriu Estadu Formasaun Professionál no Empregu (SEFOPE) sei kontinua fo formasaun ba Prijioneirus sira ho matéria ne’ebe diferente.
Jornalísta : Jynho Gusmão & Adriano Gusmão
Editór : Tynho Gusmão
Discussion about this post