Cova5 News (14-09-2022) Maria do Rozário de Fatima tinan 14 husi Eskola Bázika Central (EBC) Sândalo assume pozisaun Super-Intendente Edukasaun Munisipiu Covalima duránte oras lima (5).
Duránte assume pozisaun ne’e, Super-Intendente Edukasaun Munisipiu Covalima Maria do Rozário de Fátima halo enkontru ho Inspetur Eskola sira hodi avalia sira nia servisu, nomos rona preokupasaun ne’ebe Inspetur sira enfrenta iha sira nia servisu, no alende ne’e, Super-Intendente ne’e mos kontinua halo inspesaun ba Eskola Bázika Central Ladi.
Duránte halo inspesaun iha EBC Ladi, Super-Intendente ne’e identifika erru balun ne’ebe professor sira halo iha turma laran, tanba haruka alunus maka hakerek iha Kuadru.
Super-Intendente Edukasaun Munisipiu Covalima Maria do Rozário de Fatima sente orgullu tanba bele assume ona pozisaun Super-Intendente Edukasaun Munisipiu Covalima duránte oras lima.
“Hau sente kontente los tanba ohin hau bele assume pozisaun ida ne’e, ohin iha enkontru ne’e iha objetivu rua, ida maka halo avaliasaun servisu Inspetur sira nian nomos rona preokupasaun ne’ebe sira hasoru loro-loron, depois ohin ita halo inspesaun ba Eskola EBC Ladi konsege identifika erru balun maka professor sira halo iha turma laran, tanba haruka alunus maka hakerek iha kuadru, alunus ne’e laos atu hakerek iha kuadru, nia mai atu aprende, ne’ebe erru sira ne’e inklui preokupasaun husi Inspetur sira ne’e espera ita bele resolve ho lalais” Super-Intendente Edukasaun Munisipiu Covalima ne’e dehan iha EBC Ladi.
Kordenadór Ekipa Plan Internasional iha Munisipiu Covalima Jhony Nunes informa, Estudante Maria do Rozário de Fatima assume pozisaun ne’e, hodi selebra loron Mundial ba labarik feto ne’ebe sei realiza iha loron 11 Outubru tinan ne’e.
“Kada tinan Plan Internasional selebra loron mundial ba Labarik Feto, ninia objetivu husi aktividades ida ne’e maka oinsa sira bele iha esperiénsia atu sai lideransa ida ne’ebe maka diak iha futuru oin mai” Jhony Nunes informa.
Enkuantu iha Munisipiu Covalima Estudante nain tolu maka sei assume pozisaun tolu, maka hanesan Maria do Rozário de Fatima assume pozisaun Super-Intendente Edukasaun Munisipiu Covalima iha Kuarta-Feira ohin, no Kinta-Feira aban Estudante nain ida sei assume pozisaun Administrador Munisipiu Covalima, no Sexta-Feira bainrua Estudante nain ida seluk sei assume pozisaun Diretór Servisu Munisipal Edukasaun Munisipiu Covalima.
Entretantu Estudante nain tolu ne’e, nain ida mai husi Eskola Bázika Central Sândalo no nain rua seluk mai husi Eskola Bázika Central São Luiz Gonzaga.
Jornalista : Tynho Gusmão
Editór : Tynho Gusmão
Discussion about this post