Cova5 News (12-09-2022) Aliansa Nasionál Kontrólu Tabako hetan apoiu husi Sekretariádu Estadu Juventude no Desportu (SEJD), Segunda-Feira ne’e realiza semináriu ba Estudante Ensinu Sekundáriu sira iha Salaun Sentru Juventude Covalima (SJC) konaba impáktu tabako ba ema nia Saúde no prevensaun moras la hadaet.
Diretór Ezekutivu ANKT Sancho Fernandes hateten, objetivu husi semináriu ne’e atu hasa’e foin sae sira nia koñesimentu konaba impaktu husi tabako, no objetivu seluk atu reforsa papel Autoridade sira oinsa bele foti asaun tuir dekretu lei ne’ebe iha hodi implementa iha Munisipiu.
“ Objetivu ba semináriu ida ne’e atu divulga informasaun ba Estudante sira konaba impaktu husi sigaru ba ita nia saúde, tanba ami hare previlensia asesibilidade informasaun ne’e sei menus hela, tanba ne’e maka ohin ita hasae koñesimentu juventude sira nian konaba impaktu husi tabako, seluk tan maka reforsa papel Autoridade sira nian konaba lei kontrolu tabako, atu bele foti asaun tuir dekretu lei hodi implementa iha Munisipiu” Diretór Ezekutivu ne’e dehan iha nia intervista.
Diretór Ezekutivu ne’e dehan, Autoridade Sanitáriu Munisipiu, PNTL inklui Ministériu Saúde, iha papel atu reforsa lei kontrólu tabako ne’ebe bandu fuma sigaru iha fatin públiku no bandu fa’an sigaru ba labarik sira ho tinan 17 mai kraik.
“ Tuir lei ne’e iha Orgaun hira maka bele implementa lei ne’e, primeiru maka Autoridade Sanitariu Munisipiu, PNTL ho Ministériu Saúde sira iha papel atu halo inspesaun atu reforsa implementasaun lei kontrolu tabako ne’e, tantu fuma iha fatin públiku no fa’an sigaru ba labarik minoridade sira nsst” Sancho Fernandes informa.
Estudante Fortunado de Jesus husi Eskola Téknika Vokasionál Akar-Laran, nia sente orgullu ho semináriu ne’e, nia promesa sei hatutan ba nia kolega sira hodi nune’e bele hamenus konsumu tabako.
“ Hau sente kontente tuir seminariu konaba impaktu tabako ba ema nia Saúde no prevensaun moras la hadaet, depois informasaun ne’ebe hau hetan hau sei hatutan ba hau nia kolega sira ne’ebe maka ohin la partisipa iha semináriu ida ne’e” Fortunadu dehan.
Iha Lei artigu 36 bandu vendedor sira labele fa’an sigaru ba labarik minoridade sira, labele fa’an sigaru rahun, no labele halo promosaun inklui labele fa’an sigaru elisitu sira, no bainhira kontra lei hirak ne’e, parte kompotente sei fo koima penalidade ba vendedor sira.
Entretantu semináriu ne’e realiza duránte loron ida ne’ebe partisipa husi Administrador Munisipiu Covalima Francisco de Andrade, Diretór Sentru Juventude Covalima Calistro Leite Gusmão, Reprezentante Komandante Eskuadra Postu Suai inklui Reprezentante husi Servisu Saúde Munisipiu.
Jornalista : Ekipa Cova5 News
Editór : Tynho Gusmão
Discussion about this post