Cova5 News (11-10-2022) Administradór Postu Administrativu Maukatar Costantino Cardoso iha loron 13 Fulan Agostu liu ba ne’e, haruka Benfisiárius UKL PLUS A iha Suku Holpilat sobu hotu sira nia hela fatin no sem kordenasaun ho Ekípa PNDS Suku, Postu no Munisipiu.
Benefisiárius ba UKL PLUS A iha Suku Holpilat, Armando Gusmão Cardoso ho Marcelino Cardoso hateten, iha momentu ne’eba sira lakoi sobu sira nia uma ne’ebe sira hela ba, tanba Governu seidauk hatun material konstrusaun, maibe Administrador Postu Maukatar ne’e ameasa fali Benefisiárius sira dehan atu kansela fali wanhira sira la sobu.
Relasiona ho situasaun ne’e, Benefisiárius sira sente triste no preokupa maka’as ba sira nia hela fatin, tanba besik fulan rua ona sira hela deit iha uma provizóriu ne’ebe sira halo.
“ Ita nia Administradór Postu Maukatar momentu haruka ami sobu ami nia uma ne’e iha fulan Augustu loron 13, ne’ebe agora ami nain halo uma provizóriu ida, maibe tempu udan hanesan foin dadauk ne’e ami la toba to’o dader tanba udan ben tama, ami hanesan Povu triste tebes tanba ami nia uma sei diak hela nia haruka ami sobu hotu, depois atu tama fulan rua ona sasan ida mos seidauk mai to’o ohin loron” Armando informa.
“ Los Ami nia uma a’at duni, maibe ami hakarak sei hela iha ne’e, tanba atu ajuda ne’e sei kleur, maibe ita nia Administradór Postu ne’e mai ameasa fali dehan ami la sobu agora entaun nia atu kansela, depois nia atu fo fali ba ema seluk, entaun ami mos tauk ne’ebé sobu deit ona, udan ne’e ami obriga hela iha ne’e maibe fatin mak la diak, hau triste tanba ami nia uma ne’e ami sei bele hela, maibe nia haruka ami sobu tiha, atu tama fulan rua ona sasan la mai” Marcelino Cardoso dehan.
Diretór Delegasaun PNDS Munisipiu Covalima Filipe Cardoso Viera sente triste, tanba Administradór Postu Maukatar haruka Benefisiárius sira sobu uluk ona sira nia hela fatin sem koñesimentu husi PNDS Munisipiu, tanba ne’e nia konsidera viola matadalan PNDS nian ba implementasaun UKL PLUS A iha Postu Administrativu Maukatar.
“ Klaru, kuandu Benefisiárius ne’ebe maka sobu uluk ona ninia uma, ida ne’e la preve no la define iha mata dalan implementasaun PNDS nian, ne’ebe sira ne’ebe maka sobu uluk ona uma, antes de implementasaun ida ne’e fora koñesimentu ami PNDS Munisipiu no Postu, siknifika katak sira ne’ebe halo desizaun la bazeia ba matadalan, depois hau mos triste, lolos uma aktual ne’ebe sira hela ne’e labele sobu lai tanba seidauk hahu konstrusaun, so material konstrusaun to’o ona fatin maka bele sobu atu nune’e hahu kedan ho konstrusaun UKL PLUS A ba Benefisiárius sira” Filipe Viera Cardoso dehan iha nia kna’ar fatin.
Relasiona ho Asunto ne’e, Segunda-Feira horiseik Jornalista sira atu halo konfirmasaun ho Administrador Postu Maukatar maibe nia la iha servisu fatin, Jornalista sira koko halo konfirmasaun ho Administrador Postu Maukatar liu husi via telefone maibe nia lakoi fo komentáriu.
Entretantu Benefisiárius ba Uma Kbit Laek Plus A iha Postu Administrativu Maukatar hamutuk 75 ho orsamentu dolar Amerikanu hamutuk miliaun Sanulu resin tolu.
Jornalísta :Tynho Gusmão
Editór : Tynho Gusmão
Discussion about this post