Cova5 News (29/08/2022) Povu Covalima sei komemora loron Konsulta Populár ba dala XXIII ho orsamentu dolar Amerikanu hamutuk atus lima ($ 500,00).
Administrador Munisipiu Covalima Francisco de Andrade hateten, ba tinan ne’e Administrasaun Munisipiu la iha orsamentu, tanba ne’e Administrasaun Munisipiu Preve deit Orsamentu dolar Amerikanu atus lima ($ 500,00) hodi komemora loron Konsulta Populár ba dala XXIII ne’ebe sei realiza iha Tersa-Feira aban iha Kampu Futebaal Ladi Suku Debus Postu Administrativu Suai.
“Komemorasaun Loron Konsulta Populár ne’e ita la iha orsamentu ida, ne’ebe iha ne’eba ita tau osan atus lima deit hodi komemora loron importante ida ne’e iha Munisipiu Covalima, kuandu koalia konaba osan entaun ita nia osan la iha, Postu ne’en (6) seluk dalaruma sira mos komemora loron importante ida ne’e iha sira nia postu rasik” Administrador Munisipiu ne’e informa iha Administrasaun Munisipiu (29/08)
Administrador Munisipiu ne’e husu ba Funsionáriu sira inklui Komunidade sira hotu, atu partisipa máximu iha loron Konsulta Populár ne’ebe sei realiza iha loron Tersa-Feira aban.
“Loron aban, Funsionáriu hotu-hotu iha dever tomak atu partisipa iha serimónia Incar Bandeira hodi komemora loron Konsulta Populár, ne’ebe hau orienta ona Diretór Servisu Munisipal sira atu lori lista prezensa depois aban hatun Bandeira maka halo “Apsen” iha ne’eba” Francisco de Andrade dehan.
Entretantu Segunda Feira ohin, Funsionáriu Publiku sira hamutuk ho Estudante sira hahu halo marsa saudável haleu kapital Munisipiu hodi komemora loron konsulta populár ba 23 iha Munisipiu Covalima ne’ebe sei realiza iha kampu Futebaal Ladi iha Tersa-Feira aban (30 de Agostu 2022).
Jornalísta : Mely Santos & Jino Gusmão
Editór : Tynho Gusmão
Discussion about this post