Cova5 News (13/08/2022) Diretór Jeral Arte e Kultura husu ba Lia Nain sira husi uma lisan hotu-hotu iha territóriu nasional liu-liu iha Munisipiu Covalima, atu labele fa’an arbiru elementu ka Patromóniu kultural ne’ebe bei-ala sira husik hela.
Diretór Jeral ne’e hateten, foin dadauk akontese ona iha Munisipiu Ainaro Postu Administrativu Hatu-Builiku, Ema foti sasan lulik iha Uma lisan Ble-Hitu no Ble Lelo
Informasaun ne’e hato’o iha Sesta-Feira semana kotuk bainhira partisipa iha Serimónia Kultural tarabandu iha Postu Administrativu Fatumea Aldeia Belulik kraik.
” Ema barak mai koalia habosok katuas sira, imi fa’an imi nia sasan ne’e ho kustu dolar rihun lima, ita hanoin osan ne’e bo’ot, maibe osan rihun lima ne’e oho jerasaun uma lisan ida ne’e nian, tanba ita hare liu ba aspetu kultural oho jerasaun uma lisan ne’e tanba ita bo’ot sira fa’an tiha elementu kultural ne’ebe bei-ala sira husik hela mai ita, atu konta tuir ba jerasaun sira oinsa bele hatene istoria uma lisan nian, hau la hatene ita bo’ot sira balun fa’an ona karik, maibe kuidadu, tanba ita Postu Hatu-Builiku akontese katak Uma Lisan Ble Hitu, Ble Lelo sira nia sasan lulik ne’ebe tau iha sa’dan Lulik ema ba fokit sai hotu, ne’e ezemplu ida ba ita bo’ot sira iha ne’e atu kuidadu” Diretór Jeral dehan.
Entretantu Diretór ne’e enkoraja Lia Nain sira husi Uma Lisan 21 iha Aldeia Belulik Kraik Postu Fatumea, atu kuidadu didiak elementu kultural, hodi nune’e bele konta fila fali ba jerasaun foun sira, hodi bele hatene klean liu tan konaba istoria kultura Uma lisan nian.
Jornalísta : Tynho Gusmão & Narsizio dos Reis
Editór : Tynho Gusmão
Discussion about this post