Cova5 News (09-11-2022) Komandante PNTL Munisipiu Covalima Super-Intendente Polisia Basilio de Jesus Tersa-Feira horiseik ne’e informa, duránte iha selebrasaun loron finadu, iha Munisipiu Covalima em jeralmente situasaun lao hakmatek tanba Povu Covalima maioria ho sentidu ne’ebe maka’as atu apoiu ba iha setór Seguransa.
“ Dentro de periodu finadu situasaun iha Covalima hakmatek tanba ema hotu-hotu iha Covalima ne’e ho nia sentidu ne’ebe maka’as tebes atu apoiu ba iha setór Seguransa tanba hatudu rejultadu katak duránte Finadu Covalima situasaun lao hakmatek” Dehan Komandante PNTL Covalima.
Komandante PNTL Munisipiu Covalima ne’e dehan, Maske iha Insidente no Asidente balun ne’ebe akontese duránte iha selebrasaun loron Finadu, maibe la iha gravidade.
“ Insidente ki’ik oan sira akontese hanesan labarik sira tuda malu, provoka malu nomos asidente tráfiku balun akontese maibe la iha gravidade, ne’ebe situasaun hakmatek hela tanba ne’e laos susessu Polisia nian deit maibe ema hotu iha Covalima ida ne’e” Komandante ne’e informa.
Entretantu Komandante PNTL Munisipiu Covalima Super-Intendente Polisia Basilio De Jesus informa, atu kria estabilidade ida ne’ebe diak, ema hotu tenke sai nain ba Seguransa, no seguransa laos interese deit Polisia nian, maibe seguransa sai interese ba ema hotu tanba Fatór seguransa sai Fatór determinante ida atu alkansa dezenvolimentu Nasionál inklui ema ida-idak nia moris.
Jornalista : Tynho Gusmao
Editor : Tynho Gusmao
Discussion about this post