Cova5 News (28-09-2022) Juventude Suku Maudemo servisu hamutuk ho Unidade Servisu Postu Administrativu (USPA) Tilomar, Tersa-Feira ne’e ho inisiativa organiza malu hamos no reabilita Merkadu Salele iha Suku Maudemo Postu Administrativu Tilomar Munisipiu Covalima.
Ba Jornalista sira Reprezentante Juventude Postu Tilomar Suku Maudemo Charles Dao Jawa hateten, duránte ne’e parte husi Governu halo ona obra ne’e maibe dadaun ne’e abandona hela, tanba ne’e maka Juventude Suku Maudemo ho inisiativa hamos no reabilita merkadu ne’e atu halo jestaun ida ne’ebe diak iha futuru.
“ Inisiativu Jovem sira hamos no hadia Merkadu ida ne’e para atu halo jestaun ida ne’ebe diak liu tan iha Merkadu Salele ida ne’e, tanba duránte ne’e ita hare obra ne’e halo husi Governu depois abandona deits, entaun hare ba situasaun hirak ne’e Juventude sira iha Suku Maudemo ida ne’e hamosu ideia hodi halo kontribuisaun maka ita hadia Merkadu Salele ida ne’e ” Charles Dao Jawa dehan iha nia intervista.
Charles Dao Jawa informa, reabilitasaun Merkadu Salele ne’e hetan kontribuisaun fundus husi Juventude Postu Tilomar hamutuk Dolar Amerikanu rihun ida ($ 1000.00).
“ Ami reabilita Merkadu ne’e fundus ne’e mai husi Juventude Tilomar rasik ho montante dolar Amerikanu rihun ida hansane ($ 1000.00), ne’e kuaze Jovem sira iha Tilomar ne’e fo hotu kontribuisaun tanba kolega sira iha Suku Seluk mos fo hotu, lori ida ne’e maka ami sosa sementi no rai henek hadia merkadu uma rin sira ne’e ho sentina sira depois fatin seguransa nian depois ami pinta hotu kedan” Charles Dao Jawa ne’e esplika.
Entretantu Reprezentante Juventude ne’e dehan, bainhira remata reabilitasaun Merkadu ne’e, Juventude sira sei trasa planu hodi forma grúpu atu halo limpeza iha Loron tersa kada Semana, nomos sei prepara billete ba Vendedór sira tuir kuantidade sasan ne’ebe sira fa’an.
Jornalísta : Tynho Gusmoã & Adriano Gusmão
Editór : Tynho Gusmãos
Discussion about this post