Cova5 News (07-09-2022) Komunidade Suku Lour Postu Administrativu Zumalain hamutuk ho Autoridade Postu inklui membru Konsellu Veteranus Munisipiu Covalima Kuarta-Feira ohin, selebra trajédia loron 7 Setembru 1999, hodi sunu lilin no kari aifunan hodi presta omenazem ba Saudózu Teoflio da Silva, Saudózu Alvaro, Saudózu Daniel inklui Saudózu Francisco ne’ebe mate iha loron 7 Setembru 1999 iha Suku Lour.
Sekretáriu Zona Postu Administrativu Zumalai Fonsiano Barreto hateten, Saudózu nain ha’at (4) ne’e hetan tiru husi milisia sira, iha loron 7 Setembru 1999 bainhira halao hela seguransa ba nia Komunidade sira iha Suku Lour.
“Iha fatin ida ne’e akontesimentu ne’ebe maka hasoru Saudózu Teofilo da Silva dader san 7 de Setembru 1999 ne’ebe rejulta nia mate fatin, entaun ohin loron ita mai kari aifunan, nia mate ne’e milisi sira maka oho lori kilat no tudik, nia nu’udar Jovem ida kalan sira la hakmatek iha uma, sira hein inimigo sira iha moti sorin ne’e maka nia hetan tiru husi milisi sira, nain tolu seluk ne’e mate iha fatin ida deit sira mate iha fatin bulu iha foho leten naran “Holasol”. Sekretáriu Zona ne’e dehan iha Semitériu Saudózu Teofilo da Silva (07/09).
Membru Konsellu Veteranu Munisipiu Covalima Joaquim Barros haktuir, akontesimentu iha loron 7 Setembru 1999 iha Suku Lour ne’e, hanesan kontinuasaun husi Masakre 6 de Setembru Negro Suai, tanba ne’e Konsellu Veteranu Munisipiu, sei konsidera loron ne’e hanesan Trajédia ida ne’ebe kada tinan presiza selebra.
“Trajédia 7 de Setembru iha Suku Lour hanesan kontinuasaun husi Masakre 6 Setembru Negro Suai, tanba saida maka akontese iha Suku Lour?, tanba Komunidade Suku Lour maioria hakarak ukun rasik’an, entaun Suku Lour ne’e hanesan “Garis Merah”, ita sei hatama bai ha programa konsellu nian para bele konsidera Loron ne’ebe importante liu ba Komunidade Suku Lour, tanba ita konsidera hanesan trajédia ida” Reprezentante Konsellu Veteranus Covalima ne’e haktuir.
Enkuantu kada tinan komunidade Suku Lour selebra trajédia loron 7 Setembru 1999.
Entretantu Membru Konsellu veteran Munisipiu Covalima Joaquim Barreto husu ba Juventude sira iha Suku Lour atu buka hatene istória konaba trajédia loron 7 Setembru 1999.
Jornalísta : Tynho Gusmão
Editór : Tynho Gusmão
Discussion about this post