Cova5 News (26-10-2022) Diretór Delegasaun PNDS Munisipiu Covalima Filipe Cardoso Viera informa, implementasaun Uma Kbi’it Laek (UKL) ba faze dahuluk nian ba tinan 2021 iha Covalima hamutuk 90, husi total ne’e Uma 59 maka finaliza ona, no seluk sei iha Faze konstrusaun.
Diretór ne’e hateten, dadaun ne’e uma tolu iha Postu Administrativu Zumalai Suku Lepo Aldeia Holba to’o agora seidauk hahu konstrusaun tanba Aldeia refere seidauk asessu ba Estrada.
Informasaun ne’e hato’o iha Tersa-Feira horiseik iha Aldeia Lohorai Suku Matai bainhira Ekipa PNDS Hamutuk ho Autoridade Postu no Munisipiu entrega save Uma Kbit Laek ba Benefisiárius hamutuk nain tolu iha Suku Matai.
Konstrusaun Uma Kbi’it Laek ba faze dahuluk hamutuk 90 husi total ne’e ita finaliza ona uma 59, maibe uma 31 maka sei iha faze konstrusaun, depois uma tolu ne’ebe makai ha Postu Zumalai Suku Lepo Aldeia Holba to’o agora ita seidauk hahu konstrusaun, rajaun tanba sira seidauk asessu ba Estrada tanba ne’e maka difisil atu transporta material konstrusaun ba ne’eba, esforsu lubuk ida maka PNDS halo atu aproxima ekipamentus pezadus maibe to’o agora la hetan” Filipe Cardoso Viera informa.
Diretór Delegasaun PNDS Munisipiu Covalima ne’e argumenta, Uma 31 ida ne’ebe dadaun nee seidauk finaliza tanba Fornesedór balun hetan impedimentu ba presu material konstrusaun, maibe Diretór ne’e promete, tinan ne’e sei remata konstrusaun.
“ Progresu ba konstrusaun uma UKL 31 ne’e atinji ona 80 % besik tama ona 90 %, kestaun balun maka Fornesdór balu maka hetan impedimentu bai ha Presu Material Konstrusaun ne’ebe maka ohin loron presu mudansa, tanba agora dadaun material folin sa’e, maibe ami iha serteza katak ultimu ano 2022 ami sei remata konstrusaun ba uma hirak ne’e” Diretór PNDS Munisipiu Covalima dehan.
Entretantu implementasaun UKL ba faze daruak ba tinan 2022, Covalima hetan uma 278, husi total ne’e uma 233 maka halo aprovizionamentu loke avalia kotasaun tama ona ba faze implementasaun, no seluk sei iha faze preparasaun.
Jornalista : Tynho Gusmão
Editór : Tynho Gusmão
Discussion about this post