Cova5 News (28/08/2022) Xefe Suku Taroman Leonel Assa hateten, Munisipiu Covalima iha Postu Administrativu hitu (7), maibe Xefe Suku ne’e konsidera Postu Administrativu Fatululik la parténsia iha Munisipiu Covalima.
Kestaun ne’e nia hato’o iha Aldeia Fatuloro Suku Taroman, tanba duránte ne’e Postu Administrativu seluk dalaruma hetan tipu projétu PDIM rua ka liu, maibe Postu Administrativu Fatululik desde uluk to’o agora seidauk hetan.
“Iha Munisipiu Covalima ne’e Postu Administrativu iha hitu (7), Postu Administrativu ne’en (6) iha tipu projetu ne’e rua ou tolu, maibe ami Postu Fatululik ne’e desde uluk to’o agora ne’e ida mos la liu, tanba ne’e maka hau hanoin Postu Administrativu Fatululik ne’e la parténsia Munisipiu Covalima, se karik Postu Administrativu Fatululik mos parténsia Munisipiu Covalima entaun tuir lolos tipu projétu ida tenke tama iha Postu Fatululik, babain sira dehan sistema, maibe ba hau sistema ne’e la lo’os, tanba ami foti prioridade iha Aldeia to’o Suku to’o Postu depois lori ba Munisipiu, maibe to’o iha ne’eba maka la passa, entaun ami maka lori todan fali iha Komunidade sira nia le’et” Leonel Assa informa iha Tersa-Feira ne’e (24/08).
Relasiona ho preokupasaun hirak ne’e Sekretáriu Munisipiu Covalima Francisco Alves hateten, Programa Dezenvolvimentu Integradu Munisipal la halo diskriminasaun ba Postu Administrativu sira, tanba planu mai rasik husi Autoridade Postu sira, no Programa Dezenvolvimentu Integradu Munisipal iha formatu ida ne’ebe tenke prénxe kritéria molok implementa Projétu ne’e.
“Programa Dezenvolvimentu Integradu Munisipal la halo diskriminasaun ba Postu hotu-hotu, nia iha regras rasik atu implementa projetu ne’e iha Postu ka Suku to’o Aldeia, maibe depende planu ne’ebe mai husi kraik, tanba iha ne’eba ita mos iha formatu ida bainhira projetu ne’e mai, kuandu prenxe kritéria duni entaun bele implementa projetu ida ne’e iha Postu ne’ebe deit, tanba ita hare ba ida ne’ebe maka nessesáriu no ida ne’ebe maka urjente” Sekretáriu Munisipiu Covalima dehan hateten iha Suku Taroman iha Sexta-Feira horibainruak (26/08)
Entretantu Sekretáriu Munisipiu Covalima ne’e informa, Administrasaun Munisipiu iha ona planu, no dadaun ne’e halo hela observasaun iha terrenu, tanba tinan oin sei konstroi Edifisiu Postu Administrativu Fatululik.
Jornalísta : Tynho Gusmão
Editór : Tynho Gusmão
Discussion about this post