Cova5 News (15/07/2022) Sexta-Feira ne’e Ministru da Justisa Tiago Amaral Sarmento ho dirijente sira iha Ministériu da Justisa vijita Prijaun Suai hodi hare kondisaun no situasaun ne’ebe Prijaun Suai enfrenta relasiona ho inundasaun ne’ebe akontese iha fulan kotuk.
Governante ne’e loúva servisu Guarda Prijaun Suai, tanba konsege ultrapassa iha situasaun difisil ne’ebe akontese iha fulan kotuk hodi evakua Prijioneirus sira iha Prijaun Suai ba iha Aeroportu Komandante em Xefe das Falintil Kay Rala Xanana Gusmão iha Munisipiu Covalima.
“Ministru da Justisa hamutuk ho dirijente sira iha Ministériu da Justisa mai vijita hodi hare estabelesimentu Prijional Suai ninian, mai hare ho matan saida maka akontese iha loron hirak liu ba, iha fatin ne’e ida ne’e semana kotuk mosu inundasaun bo’ot ne’ebe afeta maka’as ba dadur sira estabelesimentu prijional suai ninian, Ministru da Justisa orgullu no agradese tebes ba Diretor Prijaun Suai ho nia membru siratanba konsege ultrapassa situasaun difisil ne’e ita hotu la espera” Ministru da Justisa Tiago Amaral dehan iha Prijaun Suai nia oin.
Governante ne’e mos konsidera, Diretór prijaun suai iha kordenasaun diak ho Autoridade Munisipiu Covalima, inklui Bombeirus, PNTL nsst, hodi bele salva prijioneirus 118 iha prijaun suai husi inundasaun ne’ebe akontese iha fulan ida ba kotuk.
“Diretór ho nia Guarda sira iha ne’e halo kordenasaun diak tebes ho instituisaun Estadu, husi Administrador Munisipiu Covalima, Bombeirus, PNTL nomos kordena ho Ministériu relevantes atu atende ba situasaun difisil ne’ebe Prijaun Suai hasoru hodi desloka dadur sira hodi salva sira nia vida, fo seguransa ba sira depois konsege sira lori fila dadur hamutuk 118 mai iha fatin ne’e ho isin diak nafatin” Governante ne’e informa.
Entretantu Ministru Justisa Tiago Amaral Sarmento enkoraja Guarda Prijaun Suai atu nafatin halao servisu ho professional.
Jornalísta :Tynho Gusmão & Marko Kortereal
Editór : Tynho Gusmão
Discussion about this post