Cova5 News (07-10-2022) Sekretária Ezekutivu PNDS hamutuk ho Autoridade Munisipiu Covalima Kinta-Feira horiseik inagura moru protesaun Eskola inklui Sala ba Professsor iha Eskola Ensinu Báziku Central Lontale Suku Debus Postu Administrativu Suai.
Sekretária Ezekutivu PNDS Claudina Soares Pinto iha nia diskursu hateten, konstrusaun Moru Protesaun inklui Sala ba Professor ne’e konstrói ho orsaméntu dolar Amerikanu hamutuk $ 54,000.00 ho objetivu atu protéje Estudante no Professor sira husi asidénte tanba Eskola ne’e besik Estrada Públiku, nomos oinsa bele hala’o prosessu aprendizajem iha Ambiente ne’ebe seguru.
“Moru ida ne’e luan tebes ho nia medida 535, depois ita mos halo sala ba Professor sira, obra ida ne’e ita halo ho orsamentu 54 mil, obra ida ne’e ita halo tanba ita hatene katak Eskola ne’e besik Estrada públiku depois animal mos ba mai hela deit entaun sira sente la seguru, tanba ne’e maka agora dadaun moru mos hotu ona hodi proteje ita nia Estudante sira bele halao prosessu aprendizajem iha Ambiente ne’ebe seguru” Claundina Soares Pinto dehan iha EBC Lontale.
Sekretária Ezekutivu PNDS ne’e husu ba Professor no Estudante sira iha Eskola Ensinu Báziku Central (EBC) Lontale atu kuidadu didiak obra ne’ebe konstroi husi PNDS, atu nune’e bele utiliza ba iha tempu ne’ebe naruk.
“ Moru Eskola nomos Sala Professor ne’ebe maka konstrui liu husi Sistema PNDS nian, ohin hau mai iha ne’e atu entrega fali ba Estudante no Professor sira atu tau matan no kuidadu didiak atu nune’e ita bot sira bele uja ba iha tempu ida ne’ebe naruk” Sekretáriu Ezekutiva PNDS ne’e hateten.
Entretantu alende serimonia inagurasaun Moru Protesaun EBC Lontale nomos Sala ba professor sira ne’e , Sekretáriu Ezekutivu PNDS ne’emos kontinua ba iha Aldeia Lo’okeu Suku Debus hodi halo inagurasaun ba Uma Kbi’it Laek hamutuk tolu iha Aldeia Lo’okeu.
Jornalísta : Ekipa Kobertura
Editór : Tynho Gusmãso
Discussion about this post