Estudante no Juventude Inteletuál Fatumea (KEJUFAT) konsidera kada tinan Orsamentu Geral Estado (OGE) hetan promulgasaun ho montante ne’ebé boot, maibé Povu barak iha Timor-Leste sei halerik ba estrada, eletrisidade, no bee-moos, número mal nutrisaun sa’e maka’as, iha território nasionál.
Ko’alia kona-ba prosesu dezenvolvimentu iha Postu Fatumea, haree ba problema insolusionadu durante tinan barak nia laran liuliu kona-ba projetu eletrisidade iha Postu Administrativu Fatumea maka estudante & akadémiku hamutuk ho povu tomak, preokupa kona-ba kestaun dezenvolvimentu ne’ebé Povu Fatumea hasoru durante Timor-Leste ukun-an to’o ohin loron ladauk hetan no sente dezenvolvimentu ne’ebé promete ona hosi Governu.
Tanba ne’e hosi ami KEJUFAT lamenta no preokupa ho projetu Eletrisidade ne’ebé mak impelementa iha Postu Administrativu Fatumea to’o agora seidauk finaliza tan hetan impedementu hosi pesoál veteranu balu hodi rezulta projetu eletrisidade iha Suku Fatumea ho Suku Nanú no Aldeia Belulik kraik la finaliza to’o agora.
Por outro lado atu lori estudante no akademiku sira no juventude Postu Fatumea nia naran hakarak sujere ba Ministério das Obras Públicas (MOP) Dr. Abel Pires da Silva, no Prezidente EDTL, E.P, banhira loke tenderizasaun atu selesiona ho di’ak tanba referensia ne’ebé KEJUFAT iha, hetan hosi peskiza nota katak iha 2016/2017, lae karik iha Postu Fatumea ne’ebé kompostu hosi Suku Tolu asesu ona eletrisidade, tanba iha momentu ne’eba hetan hosi kompañia ema Suai oan ne’ebé iha ispíritu Nasionalizmu ida ke kapas tebes hodi dada eletrisidade hosi Munisípiu Covalima to’o Postu Fatumea, no to’o iha dalan klaran hetan impedementu hosi pesoál balun ne’ebé ke hanaran an na’i veteranu, tanba ne’e mak la konsege finaliza projetu refere ba Suku rua, Suku Nanu ho Suku Fatumea.” Katak Porta Voz KEJUFAT Rui Fatima Amaral
KEJUFAT iha kompromisu sei halo rekursu hasoru pesoál balu ne’ebé karik iha tinan ne’e no ba oin nafatin tenta halo impedementu ba dezenvolvimentu iha Postu Administrativu Fatumea liuliu kona-ba Infra-estrutura hanesan Projetu eletrisidade iha tinan 2022/2023.
“Husi ami preokupa tebes hosi referénsia hirak mezmu K-RDTL fó dalan kona-ba Projetu Eletrisidade preoridade ba na’i veteranu sira maka kaer maibe karik maka iha tinan fin de 2022 ho 2023 maka projetu eletrisidade iha maka hetan impedimentu hosi pesoál balun, maka hosi estudante, akademista no juventude Postu Fatumea prontu halo rekursu hodi hasoru pesoál sira ne’ebé iha hanoin atu halo impedimentu ba parte relevante sira iha Governu.” Tenik Porta Voz Rui Fatima Amaral.
Problema insolusionadu ne’ebé mak durante tinan barak nia laran akontese iha Postu Administrativu Fatumea, maka hosi ami estudante akadémiku no juventude oras ne’e dadaun tuur hamutuk hodi ko’alia kona-ba kestaun desenvolvimentu ne’ebé Povu Fatumea hasoru, liuliu ita haree tanba sá maka kada tinan OGE ne’ebé hetan promulgasaun ho montante boot maibé povu barak iha area rurál sei halerik ba estrada, eletrisidade, ho bee-mos iha Postu Fatumea no mós Postu sira seluk iha Munisipiu Covalima.
Jornalista: Januario Barros
Editor: Januario Barros
Discussion about this post