Cova5 News (05-10-2022) Administradór Munisipiu Covalima Francisco de Andrade Kuarta-Feira ne’e hateten, hetan autorizasaun husi Ministru Justisa, Kompaña Holdit husi Munisipiu Ataúro sei halo reabilitasaun ba Salaun Uma Feto Covalima “Gedung Wanita” ho objetivu atu loke Jógu Kasino iha fatin ne’e.
Francisco de Andrade hateten, autoriza Kompaña ne’e atu halo reabilitasaun ba Salaun Uma Feto Covalima “Gedung Wanita” hodi loke Jogu Kasino tanba fo vantajem bo’ot ba Estadu nomos sei loke kampu de traballu ba Juventude sira iha Munisipiu Covalima.
“ Kompaña ne’ebe atu halo reabilitasaun ne’e naran Timor Holdit, ema Ataúro oan, objetivu husi reabilitasaun atu loke kasino iha ne’e, tanba ne’e maka sira nia lisensa ne’e mai tuir despaisu husi Ministru Justisa nian ita autoriza sira, ita autoriza tanba fo vantagem barak liu ba Estadu nomos loke kampu de traballu ba Juventude sira iha ne’e, depois sira finaliza ona reabilitasaun sira sei halo arendamentu ho Estadu, depois ba oin sira loke ona kasino ne’e sira sei selu taxa ba Estadu ne’ebe 10 % ba Taxa no 15 % ba Sosiál” Administrador Munisipiu dehan iha fatin konstrusaun Rezidénsia AMC.
Administradór Munisipiu Covalima ne’e dehan, duránte ne’e iha ema balun maka halo protesta konaba reabilitasaun Salaun Uma Feto Covalima hodi loke fali Jogu Kasino iha Munisipiu ne’e rasik.
“ Ema balun maka la satisfeitu, maibe Autoridade ne’e kuandu hare no tetu diak ona la presiza dehan ba ita bot sira, kuandu hare buat ne’e diak ba Covalima foti desizaun” AMC dehan.
Entretantu antes ne’e kompaña refere halo proposta ba Ministru Justisa, hafoin hetan aprovasaun hodi autoriza kompaña ne’e halo reabilitasaun ba Salaun Uma Feto Covalima atu loke Jogu Kasino iha fatin ne’e.
Jornalísta : Ekípa Kobertura
Editór : Tynho Gusmão
Discussion about this post