Cova5 News (10-10-2022) Sekretáriadu Estadu Protesaun Sivil servisu hamutuk ho Autoridade Munisipiu Covalima Segunda-Feira ohin realiza Semináriu Munisipal ba Estudante no Funsionáriu sira iha Salaun Restu Family ho tópiku “haforsa Sistema alerta sedu no asaun sedu hodi salva vida”.
Ba Jornalísta sira Diretór Nasional Jestaun Risku Dezastre Agostinho Cosme Belo hateten Semináriu Munisipal ne’e realiza hodi komemora loron mundial redusaun risku dezastre ne’ebe sei realiza iha loron 13 fulan ne’e, no objetivu seluk atu fahe informasaun ba públiku sira, konaba progressu servisu hirak ne’ebe duránte ne’e implementa iha Munisipiu Covalima.
“ Sekretáriadu Estadu Protesaun Sivil servisu hamutuk ho Autoridade Munisipiu Covalima ohin ho aban ita realiza semináriu Munisipal ho tópiku haforsa sistema alerta sedu no asaun sedu hodi salva vida, depois semináriu ne’e realiza tanba relasiona ho selebrasaun loron mundial redusaun risku dezastre ne’ebe monu iha dia 13 fulan ne’e, depois nia objetivu seluk maka atu fahe informasaun ba públiku konaba progressu hirak ne’ebe husi Governu, Parseiru, hanesan ONG sira ita implementa iha Covalima ” Diretór Nasionál ne’e dehan.
Iha fatin ne’e Presidente Komisaun Organizadora ba Komemorasaun Loron Mundial Redusaun Risku Dezastre iha Munisipiu Covalima Francisco de Jesus Alves informa, iha semináriu ne’e menus partisipasaun husi Autoridade Lokál sira, tanba ne’e nia husu ba Autoridade Lokál sira atu partisipa iha loron tersa-feira aban, atu nune’e bele hetan informasaun hodi hatutan ba Komunidade sira.
“ Semináriu ida ne’e importante, maibe ita fo konvite ba Autoridade local sira maibe partisipasaun ne’e menus los, maibe hau sei kontaktu sira para sira bele partisipa fali iha loron aban, atu nune’e mai rona informasaun ne’e depois bele hatutan fali ba ita nia komunidade sira” Francisco de Jesus Alves dehan.
Enkuantu Semináriu Munisipal ne’e realiza iha Salaun Restu Family durante loron rua ne’ebe hahu iha Segunda-Feira ohin, sei remata iha tersa-feira aban.
Entretantu Serimónia Komemorasaun Loron Mundial Redusaun Risku Dezastre sei realiza iha Kinta-Feira Semana ne’e iha Suku Suai Loro Postu Administrativu Suai.
Jornalísta s: Fitry de Jesus & Paulo Cardoso
Editór : Tynho Gusmão
Discussion about this post