Cova5 News (25/08/2022) Timor-Leste ukun’an tinan ruanulu (20) resin ona, maibe komunidade Aldeia tolu iha Suku Taroman Postu Administrativu Fatululik Munisipiu Covalima duránte ne’e seidauk asessu liña eletrisidade, tanba ne’e iha tempu kalan obrigadu sira tenke sunu deit kami hodi asessu naroman.
Xefe Suku Taroman Leonel Assa tersa-feira ne’e hateten, duránte ne’e EDTL,EP Covalima hamutuk ho kompaña ha’at halo ona assina akordu ho Autoridade Lokal, atu instala liña eletrisidade, tanba ne’e Xefe Suku ne’e husu ba Governu atu instala lalais tanba konsidera difikulta estudante sira atu estuda iha tempu kalan.
“Ita Timor ukun’an tinan 20 ona maibe hau nia komunidade sira iha ne’e seidauk asessu eltrisidade, iha tempu kalan sira sunu deit maka kami, tanba iha ne’e minarai mos la iha, foin dadauk sira husi EDTL Covalima hamutuk ho kompaña ha’at mai asina ona, konaba atu instala eletrisidade iha ne’e maibe kleur ona, ne’ebe hau husu ba Governu instala lalais utoan tanba difikulta ami nia oan sira atu estuda iha tempu kalan” Xefe Suku ne’e informa iha Aldeia Fatuloro (25/08).
Xefe Suku ne’e konsidera, Komunidade Aldeia Makous, Fatuloro inklui Holbac seidauk sente ukun an, maske Timor Leste ukun’an ona tina 20,tanba dadaun ne’e sira sei iha nakukun laran.
“hau sente hau nia komunidade sira iha Aldeia Tolu ne’e seidauk sente Timor nia ukun’an maske ita ukun’an ona tinan 20, tanba agora dadaun ne’e sira sei iha nakukun laran, entaun bainhira los maka atu hasai sira husi nakukun ida ne’e” Xefe Suku ne’e relata.
Entertantu total populasaun iha aldeia tolu ne’e hamutu 1505, kompostu husi Aldeia Fatuloro 548, Aldeia Holbac 394, Aldeia Makous 563.
Jornalísta : Tynho Gusmão
Editór : Tynho Gusmão
Discussion about this post