Cova5 News (08-10-2022) Uniaun Nasionál Eskuteiru Timor-Leste (UNE-TL), loron Sabadu ohin realiza serimónia investidura no tomada pose ba estrutura foun Uniaun Nasionál Eskuteiru Timor-Leste hamutuk ema nain 14 iha Munisipiu Covalima ba periódu tinan 2022 – 2026.
Vise Presidente Uniaun Nasionál Eskuteiru Timor-Leste (UNE-TL) João Carlos Sarmento ba Jornalista sira hateten, fo pose ba Estrutura foun ne’e atu promóve liu tan oinsa ezekutivu bele la’o ho diak, hodi hare importánsia formasaun ne’ebe garántia ba Juventude sira prinsipalmente ba Munisipiu Covalima.
“ Fo posse ba estrutura foun ne’e atu promóve liu tan oinsa ezekutivu bele la’o di’ak depois estabelese hanesan mos Munisipiu sira seluk mesmu ke iha barak mak iha frakeza ho desafius sira, ne’e ita laos husik hela deit, maibe ita sempre preokupa atu oinsa bele la’o ba oin hare ba importánsia formasaun ne’ebé garántia ba juventude sira prinsipalmente ba Munisipiu Covalima” Vice presidente ne’e dehan ba jornalista sira.
Presidente Uniaun Nasionál Eskuteiru iha Munisipiu Covalima Basilio de Jesus informa, Estabelesimentu Uniaun Nasionál Eskuteiru iha Munisipiu Covalima ho misaun ne’ebe envolve ema hotu, hodi servi nia povu, tanba ne’e nia espera sei halo aktividades ne’ebé iha relasaun ho asuntu ne’ebe duránte ne’e Munisipiu Covalima enfrenta.
“ Objetivu husi estabelese husi UNE-TL ne’e hau hanoin pensamentu ne’ebe diak tebes mai husi ita nia nai ulun sira husi nivel nasional agora ho UNE-TL iha munisipio covalima marka tan historia ida iha munisipio covalima misaun ida ne’ebe ma hotu hotu envolve an hodi servi nia povu signifika misaun ne’ebe orienta servisu sosiedade ita espera katak sei bele halo aktividade balu ne’ebe relasaun ho asuntu ne’ebe ita Covalima tomak enfrenta” Presidente UNE-TL dehan.
Entretantu Serimónia Investidura no fo pose ba Estrutura foun ne’e realiza iha Salaun Administrasaun Munisipiu Covalima ne’ebe partisipa husi Estudante ho Professor sira husi EBC Zumalai, São Luis Gonjaga, EBC Ogues, EBC Ladi, EBC Sândalo, no Eskola Sekundária Téknika Vokasionál Akar-Laran, Sekundária Ave Maria Suai.
Jornalísta : Adriano Gusmão & Nyna Costa
Editósr : Tynho Gusmão
Discussion about this post