Cova5 News (10-01-2023) Kordenador WFP Munisípiu Covalima, Amandio Jacob da Silva afirma tuir dadus prozeksaun ne’ebe WFP iha Munisipiu Covalima benefisariu inan isin rua no inan fo susu ba labarik hamutuk rihun tolu (3.000) resin, ho nia estimasaun hahan foos purvolta tonelada 132, koto iha tonelada 17 no mina tein tonelada 14.
“Tuir dadus prozeksaun ne’ebe Munisipiu Covalima iha ita kobre purvolta ema na’in-3.000 resin benefisariu kompostu husi inan isin rua no inan fo susu ba labarik,” informa Cordenador WFP Munisípiu Covalima, Amandio Jacob da Silva ba jornalista Jornalista sira. hafoin halo distribuisaun ai-han ba inan isin rua no inan fo susu ba labarik ne’ebe hala’o iha Sede Suku Debos, Postu Administrativu Suai, Tersa (10/01).
Amandio afirma tuir dadus prozeksaun hamutuk benefisariu rihun 3 resin ne’e ho nia estimasaun hahan foos purvolta iha tonelada 132, koto tonelada 17 no mina tein iha tonelada 14, ne’e sei distribui ba iha Suku 30 ho nia estimasaun ema purvolta rihun 3.000 resin iha Covalima.
Nia sublina distribuisaun ne’e mos ho nia kriteria rasik, inan sira ne’ebe komesa isin rua durante fulan 9 nia laran no inan sira ne’ebe fo susu komesa husi bebe zero mezes to’o fulan 12 (tinan-1) iha direitu atu simu hahan sira ne’e, maibe ba bebe sira ne’ebe tinan ida liu ona sei laiha direitu atu hetan.
“Tamba ita iha konsiderasaun iha momentu rejistrasaun bebe ne’e halo tinan ida pas, maibe bebe liu ona tinan ida labele tanba ita konsidera hahan stock tuir dadus prozeksaun ne’ebe iha ba benefisariu rihun 3.000 resin iha Covalima” nia dehan.
Diretór Sentru Solidariedade Sosiál Munisípiu Covalima, Agapito Asis Cardoso, informa governu Timor-Leste servisu hamutuk ho governu Japaun liu husi Ajensia WFP apoiu ai-han ba inan isin rua no inan sira ne’ebe fo susu ba oan ho idade tinan ida mai kraik kontinua distribui ai-han nutritivu mai iha Covalima mak ohin iha Suku Debos.
“Programa ida ne’e Ministériu Solidariedade Sosiál ho nia parseiru WFP hetan apoiu husi governu Japaun hodi tulun inan isin rua ho inan fo susu ba labarik sira ohin ita kontinua distribui ai-han nutritivu ba iha Munisípiu Covalima agora daudaun iha Suku Debos ho total benefisariu hamutuk 495” informa Diretór Sentru Solidariedade Sosiál Munisípiu Covalima, Agapito Asis Cardoso.
Agapito afirma inan isin rua na’in-ida sei simu foos kilo grama 15, koto kilo grama 2, no mina tein litru 5 ida, ba inan fo susu labarik mos hanesan, apoiu ida ne’e ba fulan tolu nian tanba kada inan isin rua no inan fo susu ba labarik ema ida sei simu foos saku 3, koto kilo grama 6 no mina tein litru 5 ida.
Agapito dehan lansamentu distribuisaun foos, mina no koto ba iha inan isin rua no inan fo susu ba labarik ne’e hahu on iha semana hirak liu ba hahu lansamentu uluk iha Suku Suai-Loro no ohin kontinua iha Suku Debos, postu Suai, Suku Maudemu Postu Administrativu Tilomar, Suku Tashilin Postu Administrativu Zumalai.
Xefe Suku Debos, Agustinho da Silva, informa total benefisariu iha Suku Debos inan isin rua no inan fo susu ba labarik hamutuk ema na’in-495, husi nemeru ida rekolla kada aldeia ida-idak.
Xefe suku Debos Agustino satisfas bainhira ajensia WFP servisu hamutuk ho governu Timor-Leste liu husi Ministériu Solidariedade Sosiál diak tebes,Tanba ne’e mak ohin loron bele apoiu netik ai-han balun ba inan isin rua no inan fo susu ba labarik iha Suku Debos ida ne’e.
Entertantu governu Japaun liu husi Ajensia Internasional Programa Ai-han Mundial (WFP, sigla Portugés) servisu hamutuk ho governu Timor-Leste hodi apoiu foos saku 1.485, koto saku 60 no mina tein kaixa 123 ba inan isin rua no inan fo susu ba labarik hamutuk ema na’in-495 iha Suku Debos, Postu Administrativu Suai, Munisipiu Covalima.
Enkuantu antes inan isin rua no inan fo susu ba atu simu ai-han hirak ne’e sei rejista uluk naran husi mediku ka infermeira sira hodi tetu isin todan hira no kman hira, depois remata ida ne’e hodi hakat ba iha simu foos, koto no mina tein.
Jornalist: Januario Barros
Editor: [email protected]
Discussion about this post