Cova5 News (03-10-2022) Relasiona ho aktu Administrador Postu Administrativu Maukatar ne’ebe uja Kareta Estadu lori hanehan rai ne’ebe ateru nomos tula nia fatuk privadu ba iha Kareta Estadu iha nia rezidénsia Aldeia Orun Suku Ogues Postu Maukatar, maka dadaun ne’e Administrador Munisipiu Covalima haruka ona karta ba Komandu PNTL Munisipiu Covalima liu husi Servisu Investigasaun atu investiga Administrador Postu Administrativu Maukatar.
Administrador Munisipiu Covalima Francisco de Andrade iha nia kna’ar fatin segunda-feira ohin ba Cova5 News informa, nia parte haruka ona karta ba PNTL Covalima atu investiga Administrador Postu Maukatar, tanba konsidera aktu Administrador Postu Maukatar nian ne’e tama iha kategória abuzu de poder nomos pekulatu de Uzo.
“ Iha Kinta ou Sexta-feira foin lalais hau halo ona karta ba Komandu PNTL Covalima atu nune’e Diresaun Investigasaun atu halo investiga Administrador Postu Maukatar ninian, atu nune’e nia halo duni abuzu de poder entaun tenke lori ba Ministériu Públiku atu bele halo julgamentu, tanba duránte ne’e karta sirkulasaun husi Nasional katak Viaturas hotu-hotu ne’ebe mak iha tenke uja tuir tempu servisu, Ezemplu hanesan Maukatar ne’e kareta ho motor tenke konsentra hotu iha Edifisiu Maukatar, maibe realidade Administrador Postu Maukatar lori ba fali nia uma, depois tula tan fatuk no hanehan rai iha nia rezidensia, ne’ebe ida ne’e tama ona kategória abuzu de poder nomos ida fali maka Peculato de Uzo, ne’ebe ida ne’e viola ona sirkular ne’ebe ita fo sai” Administradór Munisipiu dehan iha nia kna’ar fatin (03/10)
Administrador Munisipiu Covalima ne’e hateten, Administrasaun Munisipiu sei dada mos kareta estadu husi Administrador Postu Maukatar tanba dadaun ne’e prosessu kazu ne’e lao hela.
“ Ohin dader hau enkontru ho Administrador Postu sira nia la iha, ne’ebe Nia kazu ne’e agora prosessa hela, karik nia mai iha ne’e Hau mos atu dada nia kareta estadu ne’e mai para iha Administrasaun Munisipal, tanba duránte ne’e invesde nia uja kareta ne’e ba servisu lae, la oras servisu mos nia uja nafatin, ne’ebe oras ida hau sei telfone nia para kareta tenke para iha Administrasaun Munisipiu” Francisco de Andrade dehan.
Entretantu iha loron 4 fulan Setembru foin lalais ne’e Administrador Postu Maukatar ne’e uja kareta Estadu hanehan rai maten ne’ebe ateru iha area ninia rezidénsia, nomos iha Kuarta-feira loron 28 fulan setembru foin lalais ne’e, Administrador ne’e nafatin uja kareta Estadu hodi tula nia fatuk privadu iha nia uma oin iha Aldeia Orun Suku Ogues Postu Maukatar.
Jornalísta : Tynho Gusmão & Jino Gusmão
Editór : Tynho Gusmão
Discussion about this post