Cova5 News (29-09-2022) Komunidade sira iha Aldeia Orun Suku Ogues Kuarta-Feira horiseik hetan Administrador Postu Administrativu Maukatar uza Kareta Estadu ho Xapa Matríkula 06-742 G hodi tula fatuk privadu iha nia rezidénsia Aldeia Orun Suku Ogues Postu Maukatar.
Tuir Video ne’ebe Jornalista Cova5 News hetan husi Komunidade balun iha Aldeia Orun Suku Ogues Postu Maukatar katak iha loron 4 Fulan Setembru ne’emos Administrador Postu Maukatar ne’e uja kareta Estadu ne’e hanehan rai ne’ebe ateru iha nia uma oin.
Alende ida ne’e Kuarta-Feira horiseik mais ou menus tuku 5 lokraik, Administrador Postu Maukatar ne’e nafatin uja kareta Estadu nian lori lalin fatuk privadu iha ninia rezidénsia.
Maske iha Video ne’e hatudu momos, maibe Administrador Postu Maukatar ne’e la rekonese nia an katak nia nunka uja kareta Estadu nian lori hala’o atividades privadu.
“ Ami nunka mais uja kareta Estadu nian ne’e lori tula sasan, maibe ami uja kareta seluk, sira ne’e atu hafoer hau nia naran deit, Kareta ida ne’e PEMOPA nian ne’e maka lori rai maten butuk iha hau nia uma” Costantino dehan nia lae maske video hatudu momos.
Relasiona ho aktu ne’e, Administrador Munisipiu Covalima Francisco de Andrade informa, tempu badak nia sei bolu Administrador Postu Maukatar hodi husu tuir konaba aktu ne’e, tanba konsidera viola lei utilizasaun patrimóniu estadu nian.
“ Tempu badak hau sei bolu Administrador Postu Maukatar ne’e hodi husu tanba saida maka lori kareta Estadu lalin fali fatuk privadu, sira simu ona sirkular no lei mos bandu Funsionáriu hotu-hotu labele uja kareta hodi halo servisu privadu satan iha oras servisu, nomos labele uja kareta no motor estadu nia iha loron feriadu, ne’ebe hau sei bolu nia hodi husu tuir depois fo sansaun rigor atu nune’e labele repete tan” AMC dehan.
Entretantu Administrador Munisipiu Covalima Francisco de Andrade dehan, sei kolabora ho parte Komandu PNTL Covalima liu husi Xefe Seksaun Trânzitu, atu nune’e bele prende kareta estadu nian ne’ebe halo movimentu iha loron feriadu.
Jornalísta : Tynho Gusmão
Editór : Tynho Gusmão
Discussion about this post