Cova5 News (13/08/2022) Centru Juventude Covalima hetan apoiu husi Agénsia Internasional Pawanka Pan ho AIPP, servisu hamutuk ho Autoridade Postu Fatumea, Sesta-Feira semana kotuk realiza serimónia Kultural Tara-Bandu iha Aldeia Belulik kraik Suku Belulik leten Postu Administrativu Fatumea Munisipiu Covalima.
Diretór Centru Juventude Covalima Calisto Leite Gusmão hateten, Kultural Tara-Bandu hanesan eransa ida ne’ebe bei-ala sira husik hela mai ita, tanba ne’e tenke tane’as nafatin Kultura hanesan identidade, hodi prezerva no promóve lisan Tara-Bandu, iha prátika ba Jestaun Rekursu Naturais hodi minimiza Risku Dezastre.
” Ami nia objetivu prinsipal husi Tara Bandu ida ne’e maka atu prevene no proteje perigu ka risku dezastre ba meiu vida moris iha nivel Komunidade, no atu haburas liu Tan Kultura ka lisan Tara-Bandu ba jestaun rekursu naturais hodi maneza no regula interasaun entre Komunidade ida ho Komunidade seluk, no Relasaun entre Komunidade ho balada sira, tarabandu ne’e laos ita foin halo, ita nia bei ala sira husik hela mai ita sai hanesan eransa ne’ebe presiza ita prezerva, tanba Kultura mak ita nia identidade” Diretór ne’e dehan iha nia diskursu.
Iha Serimónia Kultural Tara-Bandu ne’e, iha Lei Aplikasaun External no Internal, tanba ne’e Sekretariu Munisipiu Covalima Francisco Alves husu ba makle’at sira, atu servisu ho lolos, labele hare liu ba familia, bainhira identifika ema ruma viola Lei Tara-Bandu ne’ebe estabelese ona iha Aldeia refere.
“Makleat nain sia (9) ne’e tenke servisu ho onestu, tenke ho lolos, laos hare ida viola lei Tara-Bandu maibe nia hau nia Maun, ka familia entaun hau husik deit, ne’e la lalos, hahalok hansane makle’at rasik maka kontra regra Ida kukun nian ne’e, ne’ebe makle’at sira tenke servisu ho onestidade” Sekretariu Munisipiu ne’e informa iha nia diskursu.
Iha fatin ne’e Diretór Geral Arte no Kultura Manuel Ximenes Smith husu Komunidade Belulik kraik atu halo tuir kultura ne’ebe bei-ala sira husik hela, atu nune’e bele hetan Matak no malirin.
” Ohin ita tur iha aihun bo’ot ne’e sira haklaken sira Nia opsaun barak konaba bainhira ema ruma kontra Tara-Bandu ne’e sei Kona sansaun oioin, ne’ebe buat hirak ne’e fiar ida ne’ebe Ita nia bei-ala sira horik kedan mai Ita, ne’ebe bainhira ita halo tuir ida ne’e ita sei hetan Matak no malirin” Diretór Jeral dehan iha nia intervista ba Jornalísta sira.
Enkuantu iha fase primeiru iha tinan kotuk Centru Juventude Covalima realiza ona serimónia Tara-Bandu iha Postu Fohorem Suku Dato-Rua no Suku Laktos, no Centru Juventude Covalima sei kontinua realiza Tara-Bandu iha Postu Fatululik ne’ebe sei realiza iha fulan ne’e, inklui iha Munisipiu Ainaro Postu Administrativu Hatu-Udu.
Entretantu iha Serimónia Kultural Tara-Bandu ne’e Partisipa husi Diretór Jeral Arte e Kultura, Asessor MESSK, Sekretariu Munisipiu Covalima inklui Representante Komandante PNTL Munisipiu Covalima.
Jornalísta : Tynho Gusmão & Narsizio dos Reis
Editór : Tynho Gusmão
Discussion about this post