Cova5 News (31-08-2022) Funsionáriu sira iha Munisipiu Covalima maioria uja tais tradisionál hodi selebra loron konsulta populár ba 23 iha Munisipiu Covalima.
Administrador Munisipiu Covalima Francisco de Andrade iha nia diskursu hateten, ba tinan ne’e Funsionáriu sira halo istória foun ida iha Munisipiu Covalima, tanba duránte ne’e, bainhira selebra loron espesial Funsionáriu sira uja deit gravata ho jas, maibe ba tinan ne’e Funsionáriu sira maioria uja deit tais tradisionál hodi selebra loron importante ne’e.
“Ohin ita iha Covalima halo istória foun ida, tanba babain ita halo serimónia hanesan ne’e ita hotu-hotu tau gravata ho jas, maibe ohin lae, ita tenke fila fali ba ita nia tradisaun ka kultura hodi uja hotu tais,tanba iha luta nia laran ita depende ba buat rua maka, Igreja ho Kultura, Amo nain tolu mate tanba atu salva povu ida ne’e, depois ita mos depende ba ita nia uma lisan, bua malu “biru” tanba ne’e maka ohin loron ita selebra loron importante ida ne’e uja tais tradisaun ne’e, depois ba future mos ita sei uja nafatin iha loron espesial hanesan ne’e” Administrador Munisipiu ne’e dehan iha nia diskursu.
Tuir observasaun Jornalista Cova5 News iha terenu ne’e hatudu, Parte Seguransa PNTL, Protesaun Sivil, ho Guarda Floresta maka la uja tais no uja deit sira nia farda hanesan babain.
Entretantu iha Komemorasaun Loron Konsulta Populár ba dala 23 iha Munisipiu Covalima ne’e, prenxe ho Marsa Saudável haleu kapital Munisipiu inklui halo misa agradesimentu hodi kari aifunan iha Monumentu Setembru Negro.
Jornalísta : Narsizio dos Reis
Editór : Tynho Gusmão
Discussion about this post