Cova5 News (13-09-2022) Hahu husi Fulan Juñu to’o Agostu tinan ne’e, Servisu Sekretariádu Tékniku Administrasaun Eleitoral (STAE) Munisipiu Covalima prodúz Eleitoral foun hamutuk 811, kompostu husi Eleitores foun 296 no aktualiza 500 resin.
Diretór STAE Munisipiu Covalima Francisco Gusmão Tersa-Feira ne’e iha nia kna’ar fatin hateten, duránte ne’e Ekípa Operadór hala’o hela sira nia servisu iha Postu hodi halo atendimentu ba Komunidade sira ne’ebe hela iha área rural.
“Depois de Eleisaun, husi Fulan Juñu to’o Agostu tinan ne’e, STAE Covalima halo atendimentu ba resensiamentu Eleitoral ba sira ne’ebe foun hamutuk atus-rua-sia-nulu-resin-neen (296), ba sira ne’ebe maka nia kartaun tohar, naran sala, lakon sira ne’e hamutuk atus-lima-sanulu-resin-lima (515) depois ami nia Ekípa Operadór sira komesa horiseik ativu ona iha Postu ida-idak atu halo atendimentu ba ita nia Komunidade sira ne’ebe maka hela iha area rurais, ida ne’e sira labele mai Munisipiu, sir aba deit iha postu hodi hetan Kartaun Eleitoral” Fracisco Gusmão dehan.
Enkuantu Eleisaun Presidensial foin lalais ne’e, Eleitores iha Munisipiu Covalima hamutuk rihun 47.495 maibe husi total ne’e Eleitores rihun 37.265 maka partisipa iha Eleisaun Presidensial foin lalais ne’e.
Entretantu Servisu Sekretariádu Tékniku Administrasaun Eleitoral Munisipiu Covalima husu ba Komunidade sira ne’ebe seidauk hetan Kartaun Eleitoral atu hakbesik’an ba Edifisiu STAE Munisipiu, atu nune’e bele hetan Kartaun Eleitoral hodi bele partisipa iha Eleisaun tuir mai.
Jornalísta : Paulo Cardoso
Editór : Tynho Gusmão
Discussion about this post