Cova5 News (05-09-2022) Ekípa PNDS Munisipiu Covalima hamutuk ho Autoridade Postu Administrativu Maukatar Segunda-feira ne’e halo avaliasaun ba kotasaun husi Kompaña tolu maka hanesan Kompaña Holpilat Unipessoal Lda, Kompaña Filadelfia, Kompaña Buimaras Unipessoal Lda, ba Projétu PNDS Reabilitasaun Sede Suku (RSS) no PNDS Regulér ba Projétu Estrada Sirtu iha Suku Matai Aldeia Matai.
Ofisiál Senio PNDS Munisipiu Covalima Ivonia Maria Godinho Pinto iha Sede Suku Matai hateten objetivu husi Programa PNDS nian maka Fornesedor ne’ebe manan tenke ho folin baratu no nia material tenke kualidade.
“Objetivu enkontru ba loron ohin nian, konaba Kompaña tolu ne’ebe maka toma konta ba Projetu Programa PNDS ami hahu uluk ba iha aktividades rua maka hanesan Reabilitasaun Sede Suku nomos PNDS regular ba Projétu Estrada Sirtu ba iha Aldeia Matai ida ne’e, ne’ebe avaliasaun kotasaun ida ne’e oras ida depende ba Kompaña sira ne’ebe kompete ba iha Estrada Sirtu no Reabilitasaun Sede Suku, maibe ita sei hare kompaña ne’ebe maka manan ho folin baratu ho nia material kualidade ida ne’e objetu husi programa PNDS nian” Ivónia dehan.
Iha okaziaun ne’e Xefe Suku Matai João Gusmão esklarese, hanesan Autoridade Suku Prontu kopera ho ekipa PNDS, atu ne’e projetu ne’e lao ho diak no susessu.
“Hanesan Autoridade Lokál prontu kopera nafatin ho Ekípa PNDS atu nune’e oinsa maka projetu ne’e bele susessu bainhira sira implementa, maibe hau husu mos ba Fornesedor sira atu servisu ho fuan bo’ot kopera ho PNDS atu nune’e servisu ne’e labele falla” João Gusmão
Entretantu rejultadu husi avaliasaun kotasaun ba kompaña sira ne’e, Kompaña Filadelfia sai manan nain ba Projétu rua, maka hanesan Projetu Reabilitasaun Sede Suku ho valor orsamentu Dolar Amerikanu $ 6,695.60 inklui ho PNDS regulér ba Projétu Estrada Sirtu iha Suku Matai Aldeia Matai.
Jornalísta : Tynho Gusmão
Editór : Tynho Gusmão
Discussion about this post