Cova5 News (04-10-2022) Ministériu Obras Públika (MOP) liu husi Diresaun Nasionál de Abitasaun realiza enkontru ho Autoridade sira iha Munisipiu Covalima hodi koalia konaba atu deskola Ekípa Tékniku sira, ba Postu, Suku no Aldeia hodi rekolla dadus konaba eransa ne’ebe iha tempu Portugés no Indonésia nian Nsst.
Diretora Nasionál Diresaun de Abitasaun Lolita da Silva Amaral hateten atu koloka Ekípa Tékniku sira ba Postu Suku no Aldeia hanesan baze de dadus ida atu nune’e hodi bele hatene tuir oinsa bele halo instalasaun abitasaun iha futuru.
“Ekípa Tékniku sira sei tun ba Postu, Suku no Aldeia para atu bele rekolla dadus, dadus ne’ebe Ekípa atu rekolla maka eransa ne’ebe tempu Portugés no Indonésia ninian, hanesan Rezidénsia Administrador nomos Edifísiu Postu Administrativu ninian ida ne’e mak tama iha eransa portugés ninian, nomos eransa iha tempu Indonésia nian hanesan “Perumahan” sira ne’ebe maka konstrui iha Indonesia nia tempu to’o agora, atu nune’e ba futuru instalasaun abitasaun ne’e modelu halonusa.” Diretora ne’e esplika.
Diretora ne’e dehan Eransa ne’ebe iha Tempu Portugés no Indonesian nian ne’e konsidera okupa espasu ne’ebe barak tanba ne’e koloka Ekipa Tékniku hodi rekolla dadus atu nune’e bele hatene tuir espazu hira maka atu uza hodi kria abitasaun.
“ Ninia razaun ne’e hanesan ne’e Eransa sira ne’e nia han espasu ne’e barak los perumahan sira ne’e Querdizer se perumahan sira ne’e la iha ita iha fatin livre rai luan tan ne’e mak ami iha planu atu foti duni Eransa sira ne’e para depois ita hare instalasaun ba oin ne’e mais ou menus pasu hira mak atu kria ba habitasaun bazeia ba habitasaun sira mak agora iha ne’e nia iha espasu hira mak ita utiliza ona hanesan iha suai laran karik pursentu hira mak atu kria ba habitasaun.”Diretora ne’e esplika.
Entretantu Ekipa Tékniku sei rekolla dadus eransa iha tempu Portugés no Indonesian nian iha Munisipiu Covalima durante semana rua.
Jornalísta : Narcísio Dos Reis & Jinho Gusmão
Editór : Tynho Gusmão
Discussion about this post