Cova5 News (27-09-2022) Assosiasaun Rede Covalima (ARC) hamutuk ho Autoridade Postu Administrativu Maukatar Segunda-Feira ne’e realiza reuniaun preliminária ba faze dahuluk iha Salaun CVTL Filial Covalima, ba Programa Saúde nian ne’ebe hetan apoiu fundus rihun 10 ($ 10,000.00) Dolar Amerikanu husi Servisu de Apoiu á Sosiedade Civil e Auditória Sosial (SASCAS-PM) ne’ebe sai hanesan pilótu ba fulan ne’en (6) atu implementa iha Munisipiu Covalima Postu Maukatar Suku Holpilat, Suku Ogues inklui Suku Belekasak.
Ba Cova5 News Kordenadór ba Programa Quintino Amaral Barros hateten, Programa Saúde nian ne’ebe atu implementa iha Suku tarjétu tolu ne’e, oinsa atu hare númeru mortálidade ba inan isin rua ho labarik sira, nomos kapasita komunidade sira oinsa halo prevensaun ba moras malária no déngue.
“ Enkontru ida ne’e ba faze primeiru ba programa ne’ebe apoiu fundus rihun sanulu husi Gabinte do Primeiru Ministru ba Sosiedade Sivil ninian husi SASCAS ne’e hanesan pilótu ba fulan 6 atu implementa iha Covalima hare liu ba programa Saúde ninian hanesan oinsa atu hare númeru mortálidade inan isin rua sira no labarik depois oinsa kapasita Komunidade sira oinsa halo prevensaun malaria ho Dengue, depois faze tuir mai ita sei forma grúpu Voluntáriu Auditória Sosiál atu tau matan ba implementasaun programa Governu nian iha Suku tarjetu tolu ne’e ” Quintino Amaral Barros dehan iha Salaun CVTL Filial Munisipiu Covalima.
Administradór Postu Administrativu Maukatar Costantino do Carmo Cardoso promesa sei servisu hamutuk ho Ekípa atu nune’e implementasaun Programa Saúde iha Suku tolu ne’e bele la’o ho diak no susessu.
“ Hanesan Autoridade máximu iha Postu Maukatar ami sei kolabora servisu diak ho Ekípa sira oinsa maka servisu ka implementasaun programa Saúde nian iha Suku Holpilat, Ogues no Belekasak ne’e lao ho diak nomos susessu” Costantinho dehan.
Entretantu ba faze dahuluk programa ne’e sei impementa iha Suku tarjetu tolu iha Postu Maukatar maka hanesan Suku Holpilat, Ogues inklui Belekasak, no Postu no Suku sira seluk iha Covalima sei hein etapa tuir mai.
Jornalísta : Marco Cortereal & Adriano Gusmão
Editór : Tynho Gusmão
Discussion about this post