Cova5 News (21-11-2022) Asosiasaun Voleibal Munisipiu Covalima Domingo horiseik halo abertura ba Jogu Voleibal terseira liga divizaun ba Epoka 2022 iha Salaun ESGP Suai.
Ba Cova5 News Presidente Asosiasaun Voleibal Munisipiu Covalima Miguel Araújo esplika, kompetisaun Jogu Voleibal ne’e realiza tanba hetan apoiu ekipamentus no fundus husi Governu liu husi SEJD ho montante Dolar Amerikanu hamutuk $ 2,353.00.
“ Eventu ne’e realiza tanba hetan apoiu ekipamentus no fundus husi Sekretáriadu Estadu Juventude no Despórtu ne’ebe orienta ba Federasaun Voleibal Timor-Leste depois Federasaun orienta mai iha Asosiasaun Voleibal Munisipiu Covalima hodi loke jogu voleibal terseira liga divizaun, fundus ne’ebe maka ami hetan hamutuk $.2,353.00” Miguel Araújo dehan iha Salaun ESGP laran.
Nia informa, Klubu ne’ebe partisipa iha Jogu ne’e hamutuk 19 kompostu husi Feto Klubu 10 no mane Klubu 9, no total husi Klubu ne’e mai husi Postu Administrativu sira iha Covalima.
“ Klubu ne’ebe maka partisipa iha Jogu Voleibal terseira divizaun ba epoka 2022, klubu hamutuk 19, kompostu husi Mane klubu sia (9) no Feto Klubu Sanulu (10), no klubu hirak ne’e mai husi Postu Administrativu sira iha Covalima” Nia dehan.
Ofisiál Klubu Caitara husu ba Governu liu husi SEJD, kada tinan atu apoiu Federasaun Voleibal Timor-Leste, atu nune’e atividades ne’e bele realiza kada tinan.
“Hau orgullu ho Governu liu husi SEJD ninia programa tanba bele apoiu ona FVTL depois orienta mai iha ita nia Asosiasaun Voleibal Munisipiu nian ne’ebe maka foin hari, hodi loke kompetisaun Jógu voleibal hodi aumenta ita nia jogador sira nia talentu ne’ebe maka sira iha, hau sujere se bele kada tinan ne’e sempre realiza eventu ida hanesan ne’e” Nuno Pinto Pereira dehan.
Enkuantu Jogu Voleibal ne’e hahu iha domingo horiseik, sei remata iha loron 26 fulan ne’e, no atribuisaun prémiu ba manan nain sira sei realiza iha Loron 28 Fulan ne’e depois de Incar Bandeira Nasional.
Entretantu Jogu Voleiball liga terseira divizaun iha Covalima ne’e, ba klubu ne’ebe sai kampeaun ba Primeiru lugar, sei avansa ba Jogu Voleiball segunda divizaun iha Nasional.
Jornalista : Tynho Gusmão
Editór : Tynho Gusmão
Discussion about this post