Cova5 News (01-12-2022) Komisaun Nasionál Eleisaun (Sigla Portugués “CNE”) Kinta-Feira ohin halo sensibilisaun konaba Edukasaun Sívika ho tema “Hau Lakon no Moe Wainhira La Ba Vota” ba Estudante Ensinu Sekundária Katólika Ave Maria Suai (ESKAM) no Estudante Ensinu Sekundária Téknika Vokasionál Kristal Suai.
Komisáriu CNE Destakadu Munisipiu Aileu no Covalima Carlitos Martins ba Jornalista sira hateten, Sensibilizasaun Edukasaun Sívika ne’e objetivu atu enkoraja Juventude sira ne’ebe resensiadu atu nune’e bele hola parte iha prosessu Eleisaun Parlamentár ne’ebe sei akontese iha tinan 2023.
“Edukasaun Sívika ne’e nia objetivu atu sensibiliza Eleitores sira ne’ebe resensiadu atu bele iha konsisénsia hodi bele hola parte iha prosessu Eleisaun, se sira partisipa iha Eleisaun ne’e sira partisipa ona iha prosessu dezenvolvimentu nasional” Komisariu ne’e dehan.
Komisáriu CNE ne’e informa, Eleitores sira ne’ebe la partisipa iha Eleisaun Presidensiál no Parlamentár tanba Konstituisaun RDTL la iha Artigo ida atu regula sidadaun sira ne’ebe la partisipa iha Prosessu Eleisaun.
“Tuir Artigo 65 sira ne’ebe resensiadu sira kumpri ona sira nia obrigasaun, hanesan Sidadaun ho idade 16 atu ba 17 sira uza sira nia direitu atu ba vota, maibe fila fali ba ita nia Konstituisaun RDTL tanba la iha Artigo ida maka atu regula katak Eleitores ne’ebe resensiadu tenke ba vota iha tempu Eleisaun, tanba ne’e maka CNE realiza atividades Edukasaun Sivika atu nune’e motiva sidadaun sira atu ba vota” Komisariu ne’e relata.
Estudante ESKAM Suai Zesicania Claudia Alexandra agradese ba CNE tanba motiva ona sira oinsa bele partisipa iha Prosessu Eleisaun.
“Hau orgullu no agradese ba CNE tanba ohin loron sira mai iha ne’e atu enkoraja ami oinsa bele hola parte iha Eleisaun liu-liu Eleisaun Parlamentar ne’ebe sei mosu iha tinan oin” Estudante ne’e Expressa.
Entretantu Sensibilizasaun ne’e realiza iha Eskola Téknika Vokasionál Kristal Suai, ne’ebe partisipa husi Komandante PNTL Eskuadra Postu Maukatar, Diretor Nasional CNE, Funsionariu CNE Covalima inklui ho Estudante husi ESKAM no Kristal Suai.
Jornalista : Tynho Gusmão & Jino Gusmão
Editór : Tynho Gusmão
Discussion about this post