Cova5 News (19/07/2022) Segunda-Feira (18/07) horiseik komunidade sira husi Postu Administrativu Maukatar bainhira sira ba Konsulta iha Sentru Saúde Postu Maukatar maibe Doútor sira la tama servisu, tanba ne’e Komunidade sira ne’ebe ba konsulta lori moras fila fali ba uma.
Ba Covalima News Juventude Ozoriu Gusmão husi Aldeia Lela Suku Holpilat liu husi via telefone informa, horiseik dader sira ba konsulta iha Sentru Saúde Postu Maukatar, maibe sira hein to’o tuku 10 resin ona, La Iha Doútor ruma atu halo atendementu ba sira, so iha deit maka voluntáriu nain ida, maibe voluntáriu ne’e haruka sira fila fali, tanba Doútor sira la tama servisu.
“ Buat ne’ebe maka hau hare no hatene diretamente hanesan ohin dader mais ou menus tuku 10 resin ona, ami pasiente barak maka tun ba ne’eba, maibe Doútor sira atu atende ami ne’e la iha, so voluntáriu nain ida deit maka iha maibe nia la atende ami, nia dehan dehan deit imi fila ona tanba doútor sira la iha, ne’ebe ami ema barak maka lori moras ne’e fila fali ba uma, depois sira dehan aimoruk mos la iha, ne’ebe labarik ki’ik oan sira ne’e ami lori ba fali madre sira” Ozorio Gumão dehan liu husi via telefone.
Ozorio Gusmão sente triste ho aktu ne’ebe akontese iha sentru saude refere, tanba ne’e nia husu ba Servisu Saúde Munisipio Covalima atu toma atensaun ba Servisu iha Sentru Saúde Postu Administrativu Maukatar.
“Hau sente triste uitoan tanba ami husi Lela ba Maukatar ne’e dok los, ami ba atu trata ami nia saúde maibe doutor sira la iha, ne’ebe hau husu ba Servisu Saúde Covalima se bele tau atensaun didiak ba Doútor sira nia hahalok ne’ebe la tama servisu ne’e” Ozorio informa.
Liga ho Preokupasaun hirak ne’e Jornalista Cova5 News atu halo konfirmasaun ho Diretora Servisu Saúde Munisipiu Covalima maibe la iha servisu fatin.
Jornalísta : Tynho Gusmão
Editór : Tynho Gusmão
Discussion about this post