Governu Sei Rezolve Veteranu Rejistu Iha 2003 Ho Grau 4 a 7 ne’ebé Pendente Hela

Cova5.News (08/07/2022) – Sekretáriu Estadu Assuntos Kombatentes Libertasaun Nasionál (SEAKLN) Julio da Conçeicão “Loro Mesak” hatete, Veteranus sira ne’ebe rejistu iha tinan 2003 no 2005 ne’ebe hetan grau 0 a 3, no 4 a 7 maibe dadaun ne’e pendente hela, Governu liu Ministériu Assuntos Kombatentes Libertasaun Nasional sei resolve iha tempu badak.

Informasaun ne’e hato’o iha Aldeia Lontale Suku Debus Postu Suai, bainhira halo abertura verifikasaun dadus veteranus ne’ebe rejistu iha 2009 iha Suku Debus Postu Administrativu Suai Munisipiu Covalima.

“Inan Aman sira ne’ebe uluk registu iha 2003 no 2005 depois balun hetan 0 a 3, balun hetan 4 a 7 maibe pendente hela, pendente ne’e hanesan ne’e, se nia 4 a 7 maibe nia la simu osan mil trezentus oitenta ($1.380.00), Governu sei resolve tempu badak, depois verifikasaun ida ne’e hotu, ami sei orienta ekipa tun fila fali atu resolve, maibe ba sira ne’ebe maka simu ona osan $ 1.380.00 entaun sira hela ho ida ne’e ona, tanba ita nia lei maka hateten hanesan ne’e, uluk ema ne’ebe terus dalaruma sira seidauk hetan sira nia direitu, maibe agora ema ne’ebe uluk la halo buat ida agora sira maka han osan liu fali ita ida uluk terus ne’e” Júlio da Conçeicão “Loro Mesak” dehan iha nia diskursu.

Entretantu bainhira remata verifikasaun dadus veteranus ba tinan 2009, Ekipa sei tun fila fali hodi halo verifikasaun ba Veteranus sira ne’ebe rejistu iha tinan 2003 no 2005 ne’ebe dadaun ne’e balun sei pendente hela.

Jornalista : Tynho Gusmão
Editór : Tynho Gusmão